తెలంగాణలో పంచాయతీ ఎన్నికల ప్రక్రియకు గ్రీన్ సిగ్నల్: వారం రోజుల్లో షెడ్యూల్
తెలంగాణలో పంచాయతీ ఎన్నికల నిర్వహణకు సంబంధించి రాష్ట్ర ఎన్నికల సంఘం కీలక ఏర్పాట్లు ప్రారంభించింది. మరో వారం రోజుల్లో పంచాయతీ ఎన్నికల షెడ్యూల్ విడుదల చేసేందుకు ఎస్ఈసీ చర్యలు తీసుకుంటోంది. ఈసారి పోలింగ్ను మూడు విడతల్లో నిర్వహించాలని ప్రణాళిక సిద్ధం చేసినట్లు తెలుస్తోంది.
ఎన్నికల కార్యక్రమాన్ని డిసెంబర్ 10 నుంచి 20 మధ్యలో పూర్తి చేయాలని లక్ష్యంగా పెట్టుకున్నారు. అందులో భాగంగా డిసెంబర్ 11, 14, 17 తేదీల్లో పోలింగ్ జరపనున్న అవకాశముందని సమాచారం.
ఎన్నికల ఏర్పాట్లపై తాజాగా జిల్లా కలెక్టర్లతో ఎస్ఈసీ సమావేశం నిర్వహించింది. ఎన్నికల ప్రక్రియలో ఎలాంటి లోపాలు లేకుండా పకడ్బందీగా అమలు చేయాలని కలెక్టర్లకు స్పష్టమైన ఆదేశాలు జారీ చేసింది.
ప్రజాపాలన వారోత్సవాల తర్వాతే ఎన్నికలు
తాజాగా జరిగిన కేబినెట్ సమావేశంలో పంచాయతీ ఎన్నికలు జరిపే విషయంపై నిర్ణయం తీసుకుంది. ప్రభుత్వం నిర్వహించనున్న ప్రజాపాలన వారోత్సవాలు డిసెంబర్ 1 నుంచి 9 వరకు కొనసాగనున్నందున, ఆ కార్యక్రమాల తర్వాతే ఎన్నికల ప్రక్రియ చేపట్టాలని కేబినెట్ నిర్ణయించింది. అందుకే ఎన్నికల తేదీలు డిసెంబర్ ద్వితీయ వారం తర్వాతగా ఉండనున్నాయి.
పూర్వ నోటిఫికేషన్లపై హైకోర్టు స్టే నేపథ్యం
ఇంతకుముందు జడ్పీటీసీ, ఎంసీపీటీసీ ఎన్నికల నోటిఫికేషన్ను ఎస్ఈసీ జారీ చేసింది. అలాగే ప్రభుత్వం బీసీ రిజర్వేషన్లు పెంచుతూ ఆర్డినెన్స్ జారీ చేసింది. అయితే ఈ రిజర్వేషన్లు 50% దాటుతున్నాయని హైకోర్టు ఆ నిర్ణయాన్ని రద్దు చేసింది. దీంతో స్థానిక సంస్థల ఎన్నికలు వాయిదా పడిన విషయం తెలిసిందే.
హైకోర్టు తాజాగా ఈ నెల 24లోగా ఎన్నికల నిర్వహణపై ప్రభుత్వం స్పష్టత ఇవ్వాలని ఆదేశించడంతో, ఇప్పుడు ఎస్ఈసీ ఎన్నికల ఏర్పాట్లను వేగవంతం చేస్తోందని తెలుస్తోంది.
